الكراء الافراغ

فاش عرضنا المستحقات على المكري و رفض صيفطهم المحامي بواسطة مفوض قضائي و رفض داكشي علاش كنخلصو في صندوق المحكمة .. دابا واش يقدر يحكمو بالافراغ واخا ما ثبتش التماطل كيفما قلتي ؟؟

الله يخليك، خاصنا نتفاهمو، واش داكشي لي طالبكم به المكري فالإنذار، عرضو عليه المحامي بواسطة المفوض القضائي شدو ولا رفضو ؟
وملي خديتو محضر الرفض مشيتو حطيتو المبلغ فالصندوق، ومن مورا داكشي بقيتو كتحطو شهرين مورا شهرين.

إلا كان ممكن تعطيني تاريخ التوصل بالإنذار، تاريخ ديال محضر رفض العرض العيني وتاريخ الإيداع لي فالتوصيل ديال صندوق المحكمة.

داكشي لي طالبنا بيه في الانذار عطيناه للمكري مباشرة و شدو ماشي عن طريق المفوض ...
من بعد ما شد الفلوس رفع علينا الدعوى ديال الافراغ فاش جا الحكم مشينا عندو نخلصوه ف الشهرية مابغاش ايشدوهم هي فاش سيفطنا الفلوس عن طريق المفوض وو رفض ولينا نخلصو في المحكمة و هو يستانف و اول جلسة ف اخر هاد الشهر

واش عندكم ما يثبت أن الأداء قد تم داخل الأجل المحدد في الإنذار ؟ لأن المكري شد الفلوس من يديكم لإديه، ما كاينش ما يثبت تاريخ الأداء.

ماكاينش اثبات على التاريخ ولكن خلصنا بعد الانذار بشهر ماشي ف تاريخ المحدد في الانذار ( كانت فيه غير ١٥ يوم) حيث المبلغ كان شويا كبير

والمحامي ما قالش ليكم بلي هادشي لي كنتو كاديرو فيه راه كان خاوي، حيت خلصتو شهر خارج الأجل، ولا هو بغا غير يتخلص فالأتعاب ديالو.

دابا بقات ليكم غير نقطة وحدة لي يمكن يتأيد لكم بها الحكم فالإستئناف، هي الكيفية باش تكتب الإنذار، إلا كاين منين يدخل ليها المحامي.

ديك الساعة باقي مدرناش محامي درناه من بعد ما توصلنا بدعوى الافراغ
فهمت من هدرتك باللي ممكن الحكم يكون الافراغ ؟؟
واش مكيخدوش بعين الاعتبار اننا كنسكنو منذ ازيد من ٣٢ عام ف ديك الدار و باللي المكري هو لي مكيطلبش المستحقات ديالو ؟؟

اسمح ليا، راني عيان بقيت معاك وحاولت باش نلقى شي تخريجة للمشكل ديالك، لكن ملي قلتي ليا بلي خلصتو شهر خارج الأجل، ما بقى كلام.
كما قلت ليك، الأمل الوحيد لي بقى لكم هو يتقرا الإنذار عدة مرات إلا فيه شي ثغرة منين تدخلو.

وخا شكرا بزاف و سمح ليا على الازعاج

هاداك الإنذار خاصك تديه لشي محام آخر يقراه وطلبو يأكد لك بلي الإنذار مستوفي لشروط المطالبة بالإفراغ، ولا خاص غير بالأداء.
هاني عطيتك منين تدخل إلا كان ممكن.