تمكين شقه الزوجيه

اولا استرداد الشقة مضمون بشكوي في النيابة العامة تقيد منازعة مسكن ؛ النيابة بتسأل الجيران كشهود عما إذا كان المسكن ده مسكن زوجية فعلا وعن مده اقامتك فيه وعن سبب مغادرتك ليه وبتطلب تحريات المباحث عن نفس الأمور وبتعمل معاينة للمسكن وبتصدر قرار مؤقت بتمكين الشاكية ( المطلقة الحاضنة ) من مسكن الزوجية باعتباره مسكن حضانه دون المشكو في حقه (الأب) ومنع تعرضه لها والغير في ذلك القرار ده ينفذ بالقوة الجبرية زي حكم المحكمة بصحبة معاون التنفيذ والشرطة بصرف النظر عن وجود مستأجر في الشقة من عدمه ؛ هايطردوه وهاتستلمي الشقة بشرط أنها تكون هي مسكن الزوجية فعلا ؛؛ الإجراءات دي بتاخد حوالي شهر

بالنسبة للقايمة انتي لو اتمكنتي من المسكن بالمنقولات اللي فيه خلاص مش هايبقي في مشكله لكن لو حصل اي شيء غير كده وعاوزة المنقولات اللي مكتوبة في القايمة ؛ هاترفعي عليه جنحة تبديد منقولات زوجية وتقدمي القايمة في الجنحة وهو ملزم يقدملك المنقولات المكتوبة في القايمة والا هايتحكم عليه بالحبس أو هايدفع قدام محكمة الجنح بصورية القايمة والمحكمة هاتحيل الدعوي للتحقيق وتسمع شهود اللي حضروا تحرير القايمة والمحكمة وشأنها لو اقتنعت بالصورية هياخد براءة ومش هتاخدي حاجة وده صعب جدا او هاترفض الصورية ويبقي ملزم يجيب المنقولات المكتوبة يعرضها عليكي