السلام عليكم أستاد،
عندي 2 أسئلة فمواضيع مختلفة :

1. عندنا واحد الشقة كان واخدها الأب ديالي الله يرحمو عن طريق البنك، و توفى الوالد ف 2012 و التأمين ديال البنك خلص المبلغ المتبقي، و منين مشينا نطالبو برفع اليد، لقينا بلي كاين واحد المبلغكان واخدو الأب ديالي من نفس البنك، كسلف، و لكز التأمين على داك المبلغ عند مؤسسة تأمين أخرى و مخلص المبلغ ديال التأمين كاملا. لكن المؤسسة المعنية بتأدية السلف المتبقي باش امكن لينا ناخدو رفع اليد التاني رفضات، دخلنا معاها للمحكمة، و المحكمة حكمات لصالحنا لأن التأمين مخلص و كولشي موتق. مع العلم أن الحكم داز عليه 2 السنوات، و من داك الوقت مابقينا توصلنا حتى بشي ورقة من عند العون أو عن طريق البريد بأن عندنا شي استدعاء أو شي حاجة كاتقول بأن المؤسسة ديال التأمين استئنفت الحكم. السؤال ديالي هو واش كاينة مدة محددة باش طالب بالإستئناف أو كايبقا مفتوح؟ و إلا كانت محددة و المؤسسة ماستانفاتش الحكم، إمكن لينا نطالبو برفع اليد التاني من عند المصلحة المختصة للي تابعا البنك (Contentieux) بورقة المحكمة الإبتدائية؟ و في حالة عدم رغبة المصلحة التابعة للبنك بتسليمنا رفع اليد التاني، واش خصنا ندعيوهم، أو من الأحسن ندوزو عن طريق شكاية ل Mediateur.؟

السؤال التاني :
الزوجة ديالي عملات حادتة شغل، و التأمين التابع للشركة اقتارح علينا واحد المبلغ للي ماشي فالقيمة ديال الحادتة، لأن كان هناك تفاهم بين الطبيب المعالج و طبيب التأمين باش يحددو نسبة العجز ف 3% مع العلم أن الزوجة كانت توقفات على العمل لمدة 60 يوم، و الطبيب المعالج هو للي عطاها ليها. شفنا معواحد الأستادة، خدات القضية، ومن أواخر 2016 و احنا كانطالبوها غير باش تعطينا رقم الملف باش نشوفو فين وصل عن طريق البرنامج ديال محكمتي بلا مانبقاو نتاصلو بيها كل مرة و نزعجوها، لكن رفضات، بسبب أن الزبائن من كاتعطيهم رقم الملف كايبقاو ايصدعوها، بللي باقي مكاين والو.... الخ.
الإشكال أنها منين كانتاصلو بيها، كاتقولينا مابقا والو، بدون تفسير ولا توضيح و لافين واصل الملف. واش كاين شي طريقة نقدر نعرف بها رقم الملف، و نشوف آخر تطورات الملف و نعرف آشنو كاين؟

الله يجازيك بخير و سمح لي على الإزعاج.