حكم قطعي بطلاق شقاق من طرف زوج

سيدتي لا يمكن لي أن أفيدك في الموضوع، ما دمت لم أطلع على مضمون الحكم في قاعدة المعطيات للمحكمة المختصة. فإن لم يكن لذيك مانع يمكن لك ارسال رقم الملف لأتمكن من الإطلاع على ذلك، إنما يمكن ذلك لغيري كذلك إذا أدليت برقم ملفك هنا.

لقد اطلعت على الحكم بواسطة رقم الملف على موقع خدمات قضائية و الحكم كما قلت لكم كما الآتي - واجب المتعة مبلغ 1700 درهم -واجب السكن خلال فترة العدة3000 درهم-4000 درهم عن نفقتها اثناء الحمل مع شمول الحكم بنفاذ المعجل و تحميل المدعي الصائر . هكذا كتب الحكم تماما نقلته إليكم

على ما أوتي لي من فهم للموضوع، فعبارة أثناء الحمل تعني إلى حين الوضع إن شاء الله. فبدون شك فقد سألك رئيس الجلسة أثناء البحث عن مدة الحمل عند حضور الجلسة الأولى واستنتج من ذلك المدة المدة الباقية عن الوضع.

تماما سألني القاضي عن مدة حملي آنذاك بصراحة في هاد نقطة بذات الحكم غير واضح واش على الفترة لي كان كيتم فيها طلاق او الفترة المتبقية لي باش نولد لأني الان بغيت ندير دعوة نفقة على المدة لي قضيتها في منزل اهلي و مصاريف الحمل لهذا بغيت نعرف مضمون الحكم باش نعرف الخطوم لي نتخد في دعوة نفقة

النفقةديال المدة لي قضيتها فداركم ما مذكوراش ف الحكم، لأن ما طالبتيش بها قبل الدعوى ديال الطلاق. وبدون شك حتى القاضي كان كيظن بلي ما خرجتيش من البيت الزوجية وكان عليك تديري مقال اضافي أثناء سريان الدعوى، تطالبي فيه بالنفقة ديال هاديك المدة. حتى دابا راه يمكن ليك تطالبي بها ف الإستئناف.
بخصوص مبلغ 3.000 درهم راه ديال 3 اشهر ديال العدة لي غادي تجي بعد الوضع إن شاء الله.

اه شكرا بزاف و لكن طليق ديالي مغديش ايستنف الحكم حتى انا مبغيتش نستانف حكم طلاق لانو محكمة طريقها طويلة كتشد الوقت و انا قربت نولد مبقاش عندي جهد لي نمشي نستانف لهذا قررت ندير محامي و يرفع دعوة نفقة على ديك المدة لي دوزت في بيت اهلي و مصاريف الحمل لاني خصرت بزاف فلوس في تحاليل و عندي فقر دم لي كيطلب مني دواء شهري فكرت اني ندير محامي يتكلف بدعوة نفقة الماضية و مصاريف الحمل

دابا قابلي راسك، راكي بلا شك عيانة (راه باز ليك، ها الحمل، ها المحكمة وزيد الفقصة، راه ما قصرتيش من جهدك). إن شاء الله ملي توضعي عاود فتحي هاد الملف، باش إبان ليك آش خاصك تديري، حيت بقات ليك النفقة ديال المدة لي قضيتي فداركم + مصاريف الولادة + العقيقة، عاد النفقة ديال ل B.B).
تبارك الله عليك راه باين عليك capable، بلا ما تديري محام، راه غادي غير إدي لك فلوسك ويقدر يزكل شي نقطة وتصدقي ضايعة.

اه و الله ربي لي عالم بيا حالتي صعيبة بزاف و لكن كنحاول نكون قوية و ناخد حقي من طليق ديالي لانو ظلمني بزاف و فترة الحمل كلها قضيتها في المحاكم هو داير محامي مكيجيش و لكن انا كنحضر و حاولت ندافع على راسي بوحدي قدام محامي ديالوا و الحمد لله تعويض لي عطاوني في طلاق شقاق كان في مستوى المطلوب الحمد لله اني درست سنتين في كلية الحقوق هادشي لي خلاني شوية كنفهم في القانون الا انه و لابد استشارة ذوي الخبرة في هاد المجال باش نتأكد قبل ما ناخد اي خطوة و نضمن اني ناخد جميع حقوقي و حق ولدي لي جاي في طريق الله ياخد الحق في الظالم انا لي كيبقى فيا هو ولدي لي تخلى عليه الاب ديالوا هو مزال في بطن الأم ديالوا حسبي الله و نعم الوكيل

سمحي ليا، هاد بنادم لي جابك حتى لهاد المرحلة وخوا بك، ما فيه لا رجولة، لا شهامة. كان عليه يصبر عليك حتى يشوف عوينات ولدو ولا بنتو، يمكن يتبدل الوضع بيناتكم. على كل هادشي لي كتب الله، يمكن لك تكولي ليا شحال المدخول الشهري ديالو باش نشوف ياك ما ضيعاتكش المحكمة ؟

غادي نخليك، تصبحي على خير. يمكن ليك تحجبي هاد التعاليق كلها بهاديك ل icone لي كاينة على اليسار حدا القلم.

اه مكيناش فيه حس رجولة لدرجة منين كنت حاملة في شهرين خلى خوتوا رجال ضربوني باش ايطيح ليا الولد ما تبقاش تبعاه نفقة لدرجة نعست يومين في مستشفى سويسي و لكن الحمد لله الجنين كان قوي بحال ماماه و بقى متشبت بالحياة و دابى راني متبعاه هو و الإخوان ديالوا لي ضربوني في المحكمة بتهمة الضرب و الجرح ولكن للاسف بعدما حضروا عند نائب وكيل الملك و اعطى أمر بمتابعتهم دابا مرت جلستان و لم يحضروا اليها و القاضي اعطى جلسة اخرى كنتمنى ايحضروا و ياخدوا العقاب ديالهم لانهم تكرفسوا عليا بحكم اني ما عنديش خوتي لي دفعوا عليا داروا فيا ما بغاو و لكن ليا الله الحمد لله على كلشي. بالنسبة للأجر ديالوا هو 5000 درهم و لكن اذا خدم ساعات اضافية كيوصل ليه الاجر حتى 7000 درهم و لكن طبعا انكر هادشي و جاب ورقة لواحد شهر كان تقاضى فيه 2500 درهم لانو كان تغيب فيه مخدمش بزاف و جاه الصلير ناقص لانو خدام في شركة كبلاج و لكن انا عطيت القاضي كاع الاوراق ديالوا لي فيهم شهادة الاجر وحدة فيها 6000 درهم و الاخرى 7000 درهم ثم شهادة الاجر من مدير شركة ديالوا لي فيها 5000 درهم و لكن زوج ادلى بواحد القرض لي كان مستافد منوا باش يبني البيت ديالوا وكال انهم كيقتطعوا ليه 2000 درهم . اذا شنو بان ليك في الحكم

السلام عليكم،
تتمة للرد على استشارك وبعد الإطلاع على امكانيات طليقك، أظن أن مبلغ مستلزمات الطلاق التي حكمت لك بها المحكمة تبقى منصفة وعادلة. يبقى لك الحق في المطالبة بنفقة المدة التي سبقت دعوى الطلاق ومصاريف الولادة والعقيقة إن شاء الله. بالنسبة للمحضون فستكون نفقته كما يلي (حسب تقديري الشخصي، لأن المحكمة هي التي ستقدر مبلغها ولها كامل السلطة في ذلك) : النفقة = 400 درهم + السكن = 300 درهم + أجرة الحضانة = 100 درهم + توسعة الأعياد : 600 درهم لكل عيد ديني. أما الزيارة فستكون كل يوم أحد من الساعة 10 صباحا الى 6 مساء.
وأنصحك باستئناف الحكم بعد الوضع، الله يفكك على خير.

مساء الخير، واش لا باس عليك ؟

الحمد لله كنحاول نكون بخير على قبل ولدي شكرا بزاف

بلا شك راه قريتي الجواب ديالي الأخير، راه بان لي الحكم كان منطقي ومنصف. المهم الله يفكك على خير ويعوض ليك ما ضاع إن شاء الله.
----------------------------
إن كان الرد المتوصل به مقنعا ومضمونه وملائما لإنتظاراتك، يمكن لك المصادقة على الجواب في الخانة المخصصة لذلك. 
وذلك لتعميم الفائدة وتفادي طرح أسئلة مماثلة، مع ما سيتطلبه ذلك من الإنتظار قبل الحصول على جواب خاص.
>> انقر (clic) على "صح" فوق الإجابة ليصبح أخضر